Plantun de Prouvènço

Pèr coumpara dos planto d'encò nostre

Eupatorium cannabinum & Scrophularia nodosa

Eupatòri

Eupatorium cannabinum

Asteraceae Compositae

Àutri noum : Canebe-fèr, Carbe-fèr, Epatorium, Capoun.

Noms en français : Eupatoire à feuilles de chanvre, Eupatoire chanvrine.

Descripcioun :
Planto renadivo un pau grando (>1m), bourrihudo, emé de cambo rouginasso, e que s'arremarco emé si flour roso à blanco coumpausado de flouroun en tubo. Li fueio dóu bas, óupousado, soun divisado en fuioun que dounon d'èr à-n-aquéli dóu canebe.

Usanço :
L'éupatòri èi couneigu pèr èstre vertuous contro li problèmo de fege (coulagogue) e de rèn. S'emplego de maceracioun de flour, fueio e racino. Pamens, estènt douna la presènci d'alcalouïde èi counseia de pas n'en prendre de longo.

Port : Grando erbo
Taio : 40 à 150 cm
Fueio : óupousado
Tipe bioulougico : Emicriptoufite
Cicle bioulougico : Planto renadivo

Gènre : Eupatorium
Famiho : Asteraceae
Famiho classico : Compositae

Coulour de la flour : Vióuleto
Petalo : >6
Ø (o loungour) enflourejado : 1 cm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun

Liò : Ribiero - Prado umido - Palun
Estànci : Termoumediterran à Mountagnard
Couroulougi : Paleoutemperado
Ref. sc. : Eupatorium cannabinum L., 1753

Erbo-dis-escrolo

Scrophularia nodosa

Scrophulariaceae

Nom en français : Scrofulaire noueuse.

Descripcioun :
L'erbo-dis-escrolo douno d'èr à l'erbo-dóu-siège, pamens èi mens forto, sa tijo èi carrado mai sènso alo e pleno (fotò). Ei gaire coumuno au nostre, aleva dins lis Aup marino. Trachis dins li relarg fres.

Usanço :
Coume soun noum lou dis, l'erbo-dis-escrolo èro emplegado pèr gari (o pulèu sougna) lis escrolo que soun de boufigo (fotò) que vènon dins lou còu en rapport emé la tuberculòsi que ié disien à l'Age-Mejan, en latin, struma o morbus regius (mau de rèi). A l'Age-Mejan li rèi an lou poudé de gari lis escrofo ("écrouelles" en francés). A forto doso la planto pourrié èstre empouisounanto.